(In case有人唔知道，韓綜=韓國綜藝節目keke)

講起韓綜，可能好多人都淨係識runningman，但係唔知係唔係後來側重嘉賓，d遊戲開始冇咁緊張刺激，我都漸漸放棄左呢套元老級既綜藝啦… 不過其實韓國仲有好多優質既綜藝節目架！佢地既製作十分認真，如果你同我一樣都鍾意電視汁撈飯既話，不妨試試以下三套正野啦。

第3位：尹食堂

《尹食堂》係tvn電視台係2017年新推出既節目，主要內容就係講一班韓國演員去峇里島開韓食既餐廳，陣容分別有 “老闆” 尹汝貞（已經70歲既韓國老牌實力女演員）、“廚房助手” 鄭有美（姐係釜山行裡面個大肚婆啊！）、“總務” 李瑞鎮同 “兼職” 申久。因為佢地四個都係演員，對煮野食其實都係得基本認知，所以節目組就安排左佢地先跟大廚學左味主菜 “炒牛肉”，配上包、飯或者韓式粉絲。當然，menu只得一樣野梗係唔夠做，所以佢地去到當地都有發揮自己既小宇宙整左d新菜式出黎。

節目拍攝既形式其實類似documentary同真人騷，即係擺好多部camera影佢地成日做生意，同一般任務式、著重笑位既綜藝節目唔同，舖頭好冷清就係影佢地拍烏蠅，就算有人客其實佢地都只係係度煮野食同接待，所以好多人對佢既第一印象都係覺得佢好悶哈哈。呢個時候就考製作團隊既編輯功力啦！雖然內容（我講緊佢一開始拍到既footage）又長又悶，製作組竟然可以用 “死啦會唔會冇人黎架” 同 “一下子落咁多單我地搞唔掂啦” 既情節加到幾分既刺激。再加上唔同檯客人來自唔同國家，無論係佢地獨有既習慣、語氣定飲食方式一次過呈現出黎原來又係幾有趣。雖然呢套唔係d咩會笑到你捧住個肚既綜藝節目，但係見到佢地充滿人情味既交流，人客食完野食既滿足，演員們努力後既成功，感覺真係好治癒架！(๑¯∀¯๑)

（PS記得留意製作組d裝修擺設，真係好比心機好好睇仲要應變能力超強，佩服佩服！）

第2位：無限挑戰

燈燈燈凳！冇錯，第二位就係韓國既國民綜藝-《無限挑戰》（簡稱無挑）啦！erm…我承認呢套其實都唔係真係咁冷門，甚至可能係繼runningman之後第二多外國人識既綜藝添(´⊙ω⊙`)不過唔能夠否認呢套真係underrated，同埋如果講韓綜唔講佢，又點過意得去啊？

無挑既主持群呢排其實都變化多多，由我一開始睇係在石+明秀+俊河+haha+亨敦+吉+盧洪哲，慢慢因為成員既事故得返5個要搵sixth man光熙，再因為亨敦既病而有梁世亨既加入，而家光熙入伍好似又加人…都真係經歷過唔少風浪。不過，佢地係韓國人心目中既地位真係不容忽視咁穩陣架，有唔少歌同人就係因為上過無挑而逆襲排行榜，例如zion.t既楊花大橋同hyukoh呢隊indie band咁，而且咁多年黎佢都幾乎穩守係收視一位，之前佢停播休息期間仲有人統計過MBC因為咁損失左天文數字既廣告費！

無挑每一集都有唔同嘅主題，最受矚目嘅都莫過於歌謠節同無限商社！前者就係拍每位成員pair up一個歌手，係有限時間合作一首新歌，最後尾係歌謠節上台表演。唔同成員同唔同歌手嘅化學反應都唔同，而且無挑仲不時會邀請到大牌歌手例如IU，GD&太陽，JYP等等，真係幾有睇頭架。至於無限商社就次次都唔同形式，試過係小品喜劇，音樂劇，甚至係電影，我個人就好鍾意睇最新個套電影，估唔到無挑都可以拍到咁認真、感動嘅大製作。如果以上嘅內容都吸引唔到你，唔緊要！無挑嘅內容真係好多元化，我個人最鍾意嘅就有追擊戰、錢的戰爭同極限打工，咁多集，有辣有唔辣，任君選擇！

第1位：新西遊記！！！

第一名就係眾！望！所！歸！嘅新西遊記啦哇哈哈！（雖然上圖係第3季但個人認為4季都一樣咁好睇哦(〃∀〃)）新西遊記同尹食堂一樣，都係tvn同羅英錫PD出品架，如果你熟悉元老級嘅綜藝，應該都會聽過羅PD嘅名。其實新西遊記就係新版嘅兩日一夜，去旅行嘅setting、任務、班底都好相似。第一季嘅班底有李秀根、姜虎東、李昇基同埋殷志源，之後就隨住李昇基入伍，加入左安宰賢、圭賢同宋旻浩。雖然成員有變化，但係偶像出身嘅圭賢同宋旻浩都冇咩包袱，大家嘅化學反應好正，而演員嘅安宰賢都好放得開，用愛情君嘅姿勢吸引左我啊！

第1-3季係中國拍攝，旅行期間佢地會完成唔同嘅任務，例如逃出房間、殭屍game、三角帽大作戰等等，全部都好創新（好適合偷黎自己同friend玩～嘻嘻），又會影下壯觀嘅風景等等。我認為呢個節目最吸引嘅位係出演者本身同製作單位就好熟，佢地互相吐槽嘅態度實在係太可愛啦（例：姜虎東係度講廢話嘅時候製作組會直接cut，面都唔比！），再黎就係每個成員都有少少黑洞魅力，但偶爾又會大爆發（例：宋手指！），認真都幾刺激，再配合埋製作組好盞鬼嘅旁白同編輯能力，呢套綜藝真係我心目中嘅韓綜永遠第一！

PS：如果有人同我一樣覺得妙漢好得意，記得話我知I am not alone!!!!

結論

今次就介紹住3套先啦，寫呢篇嘅主要目的都係想呢d好節目有更多人識得欣賞啊～如果大家有時間，食飯想搵d野睇住送飯的話，試試以上3套都係唔錯嘅選擇噢！當然啦，如果你地有咩好推介都記得同我講啊！